अहिल्यानगर – येथील सप्तरंग थिएटर्सच्या वतीने देण्यात येणारा ‘सप्तरंग नाट्यगौरव पुरस्कार’ यंदा मुंबई येथील जेष्ठ नाट्यकर्मी अरूण कदम यांना जाहीर झाला आहे. सदर पुरस्कार वितरणासाठी कराड ( जि. सातारा ) येथील ज्येष्ठ नाट्यकर्मी श्रीनिवास एकसंबेकर व नाट्य – मालिका अभिनेत्री दया एकसंबेकर प्रमुख अतिथी म्हणून उपस्थित राहणार असल्याची माहिती सप्तरंग थिएटर्सचे अध्यक्ष डॉ. श्याम शिंदे यांनी दिली.
सदर पुरस्कार वितरण रविवार दि. १३ ऑक्टोबर रोजी सायं ५ वा. अहमदनगर येथील यश ग्रँड हॉटेलच्या सभागृहामध्ये सप्तरंग थिएटर्सच्या ३८ व्या वर्धापन दिनानिमित्त प्रदान करण्यात येणार असल्याची माहिती सप्तरंग महोत्सवाचे स्वागताध्यक्ष ज्ञानदेव पांडुळे यांनी दिली.
श्रीनिवास एकसंबेकर हे मागील २५ वर्षापासून हौशी रंगभूमीवर कार्यरत आहेत. त्यांनी आतापर्यंत अनेक एकांकिका व नाटकांत अभिनय केला असून १० पेक्षा अधिक नाटकांचे दिग्दर्शनही केले आहे. अनेक पुरस्कार विजेत्या नाटकांचे लेखनही त्यांनी केले आहे. ते नाट्य समीक्षकही आहेत.
सप्तरंगच्या या वर्धापन दिन समारंभ प्रसंगी जिल्हयातील नाट्य क्षेत्रात कार्यरत असलेल्या व विविध ठिकाणी पुरस्कार प्राप्त झालेल्या कलावंतांचा सत्कार करण्यात येणार असल्याची माहिती संस्थेचे अध्यक्ष डॉ. श्याम शिंदे यांनी दिली. या समारंभात अहमदनगरच्या नाट्य रसिकांनी उपस्थित रहावे असे आवाहन सप्तरंगच्या विश्वस्तांनी व सदस्यांनी केले आहे.
